Obrolan Tukang Ojek

udeh sebulan eni gua puyeng ame entu orang.. (mbari nunjuk congornye Mamat dari jaoh..) 

puyeng kenape bang..

entu tuhh.. mase gare-gare badokan aje ampe ribut ame temen..

emang sebabnye ape bang..

gini.. (mbari milin kumis..)
kemaren kan si Asep bawe kuweh nyang katenye sih, dari baba Ahong ke pangkalan.. nahh.. entu kuweh jatahnye pas ame jumleh anak-anak pangkalan.. kebetulan si Mamat lagi narik langganannye ke depan.

nahh.. deh entu kuweh nyang ade langsung diembat abis ame anak-anak, kaga nunggu lagi Mamat nyang lagi narik.. pas si Mamat nyampe pangkalan lagi, entu kuweh tinggal bungkusnye doangan.. 

deh entu, kaga ade angin kaga ade ape si Mamat langsung mareh-mareh ame si Asep juge anak-anak, kate die entu kuweh buat hajatan sodarenye nyang dipesennye dari baba Ahong..

lahh terus pegimane ceritanye Asep nyang ngebagiin entu kuweh bang?

rupe-rupenye si Asep salah denger pesennye baba Ahong.. kate baba Ahong, “sep.. eluh kasih nih kuweh ame Mamat, trus kalo anak-anak pangkalan mau, tinggal ngambil kesini aje.. gua bikin eni kuweh banyak..”

nah.. Asep dengernye entu kuweh buat anak-anak pangkalan, trus si Mamat suruh ngambil di baba Ahong..

entu mah dasarnye aje, si Asep nyang rade-rade budek atawa rada bolot.. udeh tau entu kuweh buat si Mamat, masih aje dibagi-bagi anak pangkalan..
Tapi bang.. trus kenape abang puyeng ame si Mamat, kan si Mamat mareh-mareh cuman ame si Asep..?

bukan ape-ape tong.. dengerin yeee..

elu tau kaga ceritanye Anas Urbaningrum, Angie juge Nazarudin?

mmmm.. tau bang.... (sembari mikir, pura-pura tau banget..)
trus ape hubungannye ame si Mamat bang?

nyang jelas sih kaga ade hubungannye ame pare koruptor entu tong..!!, cuman nyang rada-rada mirip ceritanye.., die-die entu ribut ame temen cuman gare-gare badokan..

koq badokan bang.. (garuk-garuk kepale..)

iye lahh… bedanye badokan nyang diributin ame Mamat namenye kuweh “keranjANG” (kueh imlek) trus nyang bikin ribut orang-orang “gede” entu namenye kuweh HAMBALANG..

hahahahahaaaa… abang bise ajee.. (nyengir kude mbari nyomot rokonye bang Jabrik nyang sedari tadi dianggurin..)

(by. Jabrik)