2 Puisi Bahasa Banjar

Y.S. Agus Suseno

KAYUH BAIMBAI

ayu bangun anakku buah hati caramin mata

ari sudah landung siang

lakasi kita bakayuh ke muhara

batimpungas ikam anakku nang baiman

bawa pangayuh bukah ka jukung

si nanang atawa si galuh nang tagancang di haluan

nang kaur mata manimba di buritan

ayu hancapi ayun pangayuh

kaih ilung ka higa sampung

hantak pangayuh baimbai

tuju muhara sungai

jukung balumut magin balaju

timbun dupa kurrr sumangat lambung mangkurat

lilit babatsal pitua raga samudra

babatis tunggal bapitulakan malangkah watun

turun baluncat bajajak di babun

phusss! nang di anjung nang di tambangan!

jangan bakakutuan!

muhara masih jauh

di sana kita balabuh sauh

lalu badaku sambil manyapu paluh

1988

Y.S. Agus Suseno

 SAPULUH DAPA PADA MASIGIT NOOR

Sapuluh dapa pada tahiyat ahir ini, ya Allah

hambur kaut manusia manyambah dunia

Tanggui kubah langit nang manudungi hati runduk-rundukan

Tambus kada nang ngaran doa

Tagal halulung urang nang marista

(Sambat pang: gasan siapa banua nangini

Kota nang mahayangkang nangini

Rahmat nang kada sing pagatan nangini?)

Sapuluh dapa pada wirid ini, ya Allah

Lampu kamudaratan kacilangan kilir-kiliran nangkaya banyu mata

Tangisan duniakah nangini ngarannya atawa galahak tawanya

Atawa jaman kitakah nang sudah sasain gila?

(Ujar habar, haraga bujang asli murah banar sudah

Salambar karcis ka mal haja

Atawa bagandakan ka diskotik nang ada)

Sapuluh dapa pada dikir ini, ya Allah

Kalincawaian tangan-tangan malaikat kaadilan

Hukum kada lagi jadi junjungan, tapi duit wan kakuasaan

Rumah Sakit kada lagi jadi wadah urang garing

Tapi gudang asap nang palak kaculasan wan nafsi-nafsi

Sapuluh dapa pada masigit ini, ya Allah

Kalambisikan suara-suara nang kada kawa lagi basuara

Di murung ini lawas ulun hadangi jukung sampian

Kalu pang kawa jua ulun umpat babuat mamandirakan

Kasih sayang manusia nang taburahai buang bairan

(Basunyi pang sasakali!

Itihi rahmat-Nya nang badaradai turun

Kada katahuan nangkaya ambun

Nangkaya tangisan sukma

Tangis kada babanyu mata

Tang malibuk ha dalam dada!)

1990