PARNO ADAT SIULAK KERINCI PROVINSI JAMBI

55654d90-bc24-4a72-a994-a8b1c30f1955.jpg

Parno Adat ialah Penyampaian maksud dan tujuan dari sepangkalan tentang hajatan yang dilakukan. Parno adat ini disampaikan oleh seorang Ninik mamak kepada Ninik Mamak lainnya dengan cara berbalasan. Parno Adat Kerinci bagian Siulak ini berbeda dengan cara dari Parno Adat daerah Kerinci bagian hilir, namun maksud dan tujuann ya sama.

Beberapa Parno Adat di Siulak Kerinci Jambi antara lain adalah :

BATANG GEDANG PARNO ADAT I

“MUKADIMAH”

1. Bismillah mulai munyalo, munyalo di iku lubuk, dapatlah ikan duo tigo, bismillah mulai bakato, maaflah  kayo sado ngan duduk, kami ini kno ucap kno sarayo.
2. Ampun lah aku kupado kayo, depati ninik mamak, alim ulama cerdik pandai, anak jantan taganai rumah,  idak di tap idak dibilang, kecik idak  dipanggin namo, gedang tuh idak disebut gela. Sado dilingkut bendun dengan empat, sado ditanai lantai dengan berpak, sado disungkut atap dingan barasanggit.
3. Sungguh banyak ikan dilubuk, lubuk urang siulak mukai, siku jugo ngan dapat keno jalo, sungguh banyak kito  ngan duduk, diateh tika kembang berinai, iyo kayo situ pumennyo tempat numbuk kato nyoh.

Ado pulo dih melayu ngatokah :

1. Dalamlah lubuk uhang sungai landai, tempat uhang burulang nyalo, bukannyo pulo kito baduo nak ngacak cedik dengan pandai, kito manyambung kato uhang sipungko.
2. Gedanglah ayie dari ulu, terendam pasa uhang Sungai Landai, bukan pulo kito nak nampung tekap panghulu,  idak pulo kito nak mecat batin dibalai.
3. Terentang pulo jalan kabangko, meniti jambak masumai, tegak dilua jadi sipungko, duduk dalam rumah jadi taganai.
4. Belumnyo lntik cinok taji, idaknyo landai cinok dulang, belum pulonyo cerdik cinok kanti, idak pulonyo pandai sirupo kawan.
5. Makonyo kayo situh tempat numbuk ka katonyoh,  lah ba dik lah batampi, lah ba ayak, lah ba indang, pumennyo kayo situ ngan megang pusat jalo parimpun ikan.
6. Kayo situ  pumennyo dingan tinggi dari jauh, dengan gedang pemenuh alam, tempat cupak gantang bateduh, ibarat ayam putih terebang siang, hinggap dikayu idak balaun, basuluh ngan mato ahi, basalai dingan bulan bintang, bagalanggang  mato uhang banyak.
7. Kayo situ dingan terendam salapuk tali, dingan tahan baka sipadam maro, dingan biaso bapasih ilie bapadang mudik, dingan tau dihadis nabi dalil qur’an.
8. Habis gayung pedang taletak, habis kaji suhat dilingkut. Kini kito kilok pulo ujung tali, tali untuk pungarang bungo. Kito kilok pulo sikali ini, kito tinjau pulo sejarah uhang tuo-tuo.
9. Mano pulo sejarah uhang tuo-tuo. 

Sahidaran gunung merapi singkaran batang marueh sahinggok sapisau, pisau hanyut. Sainggok taletak ayie hitam, sahinggok sakileng ayie bangih, sahinggok durian ditakuk rajo sampai ka tiku pariaman.

1. Ka Gubah babandung duo, katempat puti siandam dewi, ka lateh lah barembun padu, ka bawah lah takersik jati, ka mudik lah tiulu, basuo ayi batitik gantung, tempat samang berebut suhak tempat ungko berebut tangih, kahili lah ta muaro basuo jung tapaut, jung tapaut same anyut, anyut ka laut dingan badebur,  ka pasir dingan manyiba, ka umbak baralun tigo, tempat ikan baranak bensu, siku jantan siku batino Nampaknyo adat lata pakai salepeh, makai ka itu ado balain-lain.
2. Atap bajahit dingan kato, bubung bakupang dingan serak, batiang batang  pasko. Balindin balantak adat, baansuk lembago undang, diateh jariau karang bajalin, diateh lantai kembang berpak, diateh tika kembang basuji, diateh lampit kembang barinai. Dinai adat dinai pasko, adat lansim pasko kawi suluh bindang dalam nagari.
3. Adat rumah basendi batu, bersendi bahaluan. Rumah batiang bataganai. Parit babinteng dengan pasko. Lebuh bapaga  dengan laheng.  Jalan panjang bakandang serak, sumo tagenang bapaga malu, pulau iluk tempat ibadat.
4. Lah batemu pulo pukat dingan lukah, patut disirat daun jalo. Lah batemu adat dingan kitabullah, patut pulo dibilang hajat uhang sipungko.
5. Jangan pulo idak dibilang usul dingan asal. Apo sebab dengan karano nyoh, jangan cinok makan bulih balin, cinok tebu di punggung musang, cinok ayie dalam sayak  idak bamaro idak bahulu. Jangen-jangen pulo cinok buluh hanyut tengah duo uweh, timbul-timbul tenggelam. Idak tentu ujung dingan pangken, idak adat pakai kito tentang itu.
6. Mano dingan adat pakai dikito, terbit getah dari batang, terbit ayie dari hulu, terbit angin dari puhun, terbit kato dari pado mulo.

== MANO MENJADI MULO KATONYOH ==

BATANG GEDANG PARNO ADAT II

1. Adopun usul dengan asal, pangkan kato idak kito ninggan, terbit getah dari batang terbit ayie dari ulu terbit angin dari pohon, terbit kato dari mulo nyoh.
2. Mano menjadi mulo katonyoh, cerpah nan bakutak-kutak, sakutak parapit tudung. Sembahku ini mulai bajejak dari pangkan teruh ka ujung.
3. Tebin balingkek dingan undang, tapian bapagar baso lebuh bapagar dengan laheng jalan basapu dengan adat, laman basapu dengan pakai bendun balukis balembago. Atap bajahit dengan kato, umah batiang bataganai.
4. Rakru minal asani, kajambak kajamburuh. Ditasdidkan dalam hati diikrarkan dengan lidah, sahidaran perkataan ku ini mintak disampaikan oleh Allah Subhanahuwata’ala.
5. Azulul minallah, azalul binarrasul. Asal turun dari pado Allah, usul datang dari pado rasul. Tak kalo nabi kito menerimo agamo Islam, didalam Masjidil Haram, diNagari Mekkah Mukarramah dekat Ka’bah dalam Baitullah.
6. Mako bershalawat nabi kito digua Hira diwaktu itu, turunlah Qur’an tigo puluh jus untuk diperbentang diperpanjang untuk pedoman kito dingan hidup. Jadi amal pulo bagi uhang dingan mati.
7. Diturunkan pulo kitab seratus empat buah kitab. Makonyo tentu pulo iman, islam, tauhid, ma’rifat. Disitu pulo terdapat sah dengan batal, halal dingan haram, harus dingan makruh, pardu dingan sunat, mako lahirlah Adat bersendi sara’, sara’ bersendi kitabullah. Serak yang mengato, adat yang memakai, serak kembang kamuko, adat kembang kebelakang.
8. Mano dikatokan serak kembang kamuko, adat kembang kebelakang. Serak kembang kamuko mempedomani Qur’an dingan hadits nabi kito Muhammad Rasulullah SAW, adat kembang kebelakang mengambil contoh yang telah sudah mengambil tuah yang telah menang, mengambil tauladan yang baik sebagaimano pulo kito meneladani nabi Muhammad SAW.
9. Jadi nampaknyoh lah bertemu pulo pesat dengan lukah, patut disirit daun jalo, bertemu adat dingan kitabullah. Patut pulo kito bilang hajat uhang sipungko.
10. Mano pulo hajat uhang sipungko, kalu nak tau pado ujung kembali kito pado pangken, nak tau pado pangken, kembali pulo kito pado asal.

BATANG GEDANG PARNO ADAT III

ASSALAMU’ALAIKUM

WARAHMATULLAHI WABARAKATUH

1. Sejak Mano Mulai Munyalo. Munyalo di lubuk sawo anggah. Sejak Mano kito Mulai Bukato. Kito Mulai Dengan Bismillah.

Bismillahhirrahmanirrahim

1. Buumo ditepi tebat, ayie nyo gedang sampai kuumo. Sihih ti Ulu Lah Kami Jawat. Mak Senang Pulo Hati Kito Busamo.
2. Sairing balam dingan merbah, Balam Lalu Merebah Mandi. Sairing Lah Salam Dingan Sembah. Salam Lalu Sembah Kembali.
3. Di Kembalikah Kepado Kayo Depati Nenek Mamak, Urang Cerdik Cendikio, Alim Ulamo, Cerdik Pandai Segalo Tau, Suluh Bindang Dalam Negeri.
4. Kayo Dingan Tau Di Uku Dengan Jangku, Kayo Dengan Tau Di Ireng Dengan Gindeng, Kayo Dengan Tau Di Bayang Kato Sampai.

Kami Sini Bak Dih Melayu Mengatokan.

1. Nak ilie kumuaro imat, Jalan Munempuh dusun tamiai, Dusun Tamiai balainyo rami, Kami ini Slaku Uhang Mudo Kurang Pendapat, uhang mudo idak pulo nyo pandai, Kok Pandai usah di Puji. Jikalau Salah Bulih Di Tunjukkan.
2. Kami Ini Belum nyo Lentik Cinok Taji. Idak nyo Landai Cinok Cawan. Belum nyo Cedik sirupo kanti, idak pulo nyo pandai sirupo uhang.
3. Kreh Adat denting budenting, lunak Lembago jilo bajilo. Dilipat siliba kuku, dibentang siliba alam.
4. Kami ini Kno Ucap Kno Sayo, jadi kudo palajang bukit, pangayuh biduk ilie, panyampai saluko adat, adat dilingkut kuto, adat di Siulak Tigo Luhah Tanah Sekudung.
5. Dalam Lah lubuk uhang sulak mukai, Pasang Nyo Jenak Dari Hulu. Hanyut Lah Batang ka muaro, Bukan nyo Aku Ini Nak Ngacak cerdik dingan Pandai. Menuhut Tatah Telitih Adat Urang Tuo Dulu. Untuk nyampaikan Hajat Urang Si Pungko.
6. Ingat di hakikat umah kito, atap bajahit dingan kato, bubung bakupang dingan srak, batiang batang pasko, balindin balantak adat, ba ansuk limbago undang, diateh jariau karang bajalin, diateh lampit kembang barinai, diateh lapik  kembang basuji, dinai adat dinai pasko, adat lansim pasko kawi suluh bindang dalam nagari.
7. Adat umah bersendi batu, bersendi berhaluan, umah batiang bataganai. Parit babinteng dingan pasko, lebuh bapaga dingan laheng, jalan panjang bakandang srak, sumo tigenang bapaga malu, pulau iluk tempat ibadat.
8. Lah mulat ayie dipamuluh, beku kato dimupakat, lah ba dik batampi lumat, lah sipakat Tigo Depati dalam luhah kito, So Depati Intan, duo Rajo Simpan Bumi, tigo Depati Mangkubumi, mako lahirlah Adat basendi srak, srak basendi kitabullah. Srak dingan ngato, adat dingan makai. Sah dipakai, salah dibuang.
9. Nampaknyo, lah batemu pukat dingan lukah, iluk disirat laun jalo, lah batemu adat dingan kitabullah, patut dibilang hajat uhang sipungko.
10. Jangan pulo idak dibilang usul dingan asal, apo sebab dingan karnonyoh, jangan pulo cinak makan bulih malin, cinok ayie dalam sayak idak bamaro idak bahulu.

Ado dih malayu ngato :

1. Smaklah ladang ulah dilalang, ladang munjadi sipadang kapeh, idak Di Tap idak Di Bilang. Salah Bayie Utang dak Lpeh.
2. Tbitlah getah dari batang, tebitlah ayie dari hulu turunlah angin dari gunung, tbit pulo kato dari mulonyoh.
3. Mano munjadi mulo katonyo………

PARNO ADAT  UNTUK UHANG NIKAH

1.  Baco Salah satu Batang Gedang Parno Adat

1. Adopun uhang umah ini ado ngan naruh anak bujang, ado pulo ngan naruh anak gadih. Surang naruh anak bujang surang  pulo naruh anak gadih.
2. Adat gadih uhang dulu-dulu, salamben mato pantai, petang basambut dingan senjo, senjo bajawat dingan malam. Lah baltuh manyahap pintu manyahap singem, lah balcer pulo nyindap kasalai. Same maringgit maringgit seni, same marindu marindu sayut, ngatokah : Uhang buumo dikayu aro, uhang munyalo di sluk lubuk, Mano pulo kayo lino neh wo, Kayo ado tau hatiku mabuk.

Ado pulo dih malayu ngatokah :

1. Keris panjang idak batali, tasangkut diwarung-warung.  Kalu nahu gadih gedang idak  bakanti, samon bae kito nyimpen lama si galumbung. Bajago  siang dingan malam, di tentu uhang masuk uhang kalua. Kalu idak tentu uhang masuk uhang kalua, same lama dijilat api.
2. Jangen-jangen cinok api makan sekam, lah bamaho mako kito tau. Kalu nagari lah di iyak api, dusun lah di ndam maro. Kito jugo selaku ninek mamak dengan bapedeh mato dilamun asap.
3. Kalu naruh anak bujang samon naruh pipit jantan idak basarang, kerbau gedang  idak bakandang, kalu idak kito andun ka bukit dingan tinggi, kalurah dingan dalam,  kapadang dingan ujo, nyondak suki makan. Kalu kito  biya ilie lpeh mudik talampau, menuhut lebuh laman tapian. Same uhang dilenyut iku nyoh, diledin talinyoh, dilentung tambeng nyoh. Kalulah uhang dilenyut iku  dilenyut tali dilentung tambang, kito jugo selaku ninek mamak dingan kno gayung pedang dingan hilang, keno tikam keris dingan ait, keno getah kayu aro mati.

Ado Pulo dih melayu ngatokah :

1. Uncang gedang idak barisi  taletak dalam bahung, kalu bujang gedang idak bakanti, mano duduk situ nyoh bumenung.
2. Adat bujang uhang dulu-dulu selamben mato pantai, petang basambut dingan senjo, senjo bajawat dingan malam. Lah balilie jalan panjang lah bamudik jalan pandak, sado pintu sado baketuk sado dinding sado bacintik, sakit taraso diujung kuku, lah pumen ilie dingan mudik, iyo rumah ini nian jajak dingan katuju.
3. Lah bertemu pulo mande dingan ayah sarato pulo ninik mamak pati panghulu duo belah pihak. Lah beku kato  dimupakat  lah mulat ayie dipamuluh, lah dicari pulo ahi baik bulan baik, ahi agung bulan indah, langsung pulo dicacak ahi, takuk malemnyoh, tepat pulo petang kamis malam jum’at.
4. Iyo nikah lah dilangsung, ijab ladi jawab.  Menikah pulo secaro adat breh sapinggan ayam siku, siku jantan siku batino, siku kalabu  belang laut. Dulu iyo anak dagang tabuang hino, kiro umah ini nian badannyo tapaut.
5. Pasang dap pasang palito, uhang bagendang ditebing tinggi, tika lah tikembang, lek lah tibo pulo, barunyo senang hati senang punano.
6. Jangen-jangen cimedak kinconyo ayam, bacampu dingan buah nangko puri, tamaka bumbu kayu manih, kalulah titumpah kasih dingan sayang, basuo parajo idak jadi, situ banyak anak mudo barambuk tangih.
7. Samo tau bae tangih anak uhang minin, taunyo muratap same babilang, babilang dalam selimut, kalu barubah kasih dingan sayang, samon bae cinok biduk karam dilaut.
8. Kalunyo anak uhang buduo ini, sekali kebat maknyo ptih, sekali takuk maknyo dalam, maknyo saiyo sakato, kalu kailie maknyo sarantak satang kalunyo kamudik sarengkuh dayung, mak salinting bak besi, mak saciok bak ayam, mak saumpun bak cerai.
9. Jangan pulo nyo sinjeng kaki  naik sigai, suhang nak ilie suhang nak mudik.  Kalulah sin jeng kaki naik sigai, suhang nak ilie suhang nak mudik, lambat cepen awak bucerai, tipakso bajawet ijab babalik-balik.
10. Kalunyo anak uhang baduo ini, mak bupintak kito ninik mamak pati pangulu, maknyo biak mak nyo kembang, mak sugih maknyo kayo bulih mak nyo nukuk bubung umah, maknyo nambah bubung bilik. Apo dicinto cepat dapat, apo dipintak cepat ado, apo ngan ditanam cepat tumbuh, apo ngan diidut maknyo cepat biak, maknyo biak baratuh kembang baribu. Itu kito pintak kapado Allah Subhana Hu Wata’ala.
11. Kini anak  buah anak kemenakan kami, kami anta duduk sumendo di kak kayo itu, pipih di tepik, bulek pagiling di kayo. Ajun arahlah dikayo, kalu anggah tanduknyo papeh dikayo, gedang karaso, limpa panjang, kapiennyo leleh, kalunyo nak tinggi pado pucuk, nak gedang pado bangka, kalu pipih idak tatepik, bulek idak pagiling dikayo, silung ka jugo kami nenek mamak belah sini, bulih mak samon-samon kito ngajakah.
12. Kini anak buah anak punakan kami, kami anta duduk sumendo kak kayo itu, sedapat mungkin mak semendo nenek mamak. Mano dikato semendo ninik mamak, kalunyo baremeh panudung malu, kalu paningka panyambut gayung.

Ado pulo dih malayu ngato :

Naki bukit uhang sungai tuak, singgah berenti ditengah umo, iluk nian semendo ninek mamak, tempat uhang batuik uhang batanyo.

Jangen-jangen semendo kacang miang.

1. Mano dikato semendo kacang miang, banyak uhang tasinggung keno beh nyo, tagiser keno  biengnyo, cerdik jering nak berisi, cerdik kacang nak menilit, tumbuh dipapan nak bertak, tumbuh diduri nak saginjek.

Ado jugo dih malayu ngato :

1. Naki bukit siulak mukai, singgah berenti plak tantak, cerdik plit jangan dipakai, banyak uhang kagejin ngimak awak. Iluk pulo semendo tanggo rapek, gedang kecik tuo mudo tau nempuh pindek katonyoh, kecik kutu gedang tumo, kecik katuju gedang tarimo.
2. Jangen-jangen pulo semendo ayam gedang, mano pulo dikato semendo  ayam gedang. Iku panjang kapiat anggah, bakukuk ilie mudik, kalua pagi-pagi balik petang-petang. Mano ayam batino situ awak, kamuluk nian idak barisi.

Ado jugo dih malayu ngato :

Makan sirih bagalang pinang, basugi tamako jawo, kalu uhang pamilih banyak tunang, kalu uhang kamuden banyak jando.

1. Jangan pulo semendo kucing kurus, mano pulo dikato semendo kucing kurus, maningku sudut lapu cilik lino, ngimak uhang batanak panano kak paih ikan    uhang jugo. Kato adat ngatokah : lah semak                                                                       jalan katapian lah terang jalan kalapu.

Ado dih malayu ngato:

1. Burung tuak  burung kalabu, layang-layang manyapu buih, uhang batanak jangan nian ditunggu, same awak dicimba ngan ayie lidih.
2. Kini nampak lurus jalan kusulak panjang, jalan basimpang kusulak kecik,  basimpang pulo jalan kagao, kalu kito bentang mbuhnyo panjang, bulih sipanjang tali la lang,  kini kito puntan bae maknyo singkek, kito ambik bae sado ngan baguno .
3. Durian ditengah padang, ureknyo timbun batimbun, kamianlah tipanggang, jambalah tirajun, mintak tolong baco do’a barkat, do’a salamat, mak nyo jauh sagalo punyakit, maknyo ampi sagalo rizki, kacak mak nyo baik, pintak maknyo balaku, mano  ngan hak mintak dikabulkan Allah SWT hendaknyo.

Gunung kurinci kamaro imat

Singgah  berenti dusun semurup

Kak jalan simpang kagao

Kaji  pumennyo lah temat

Kitablah titungkut

Kini kami pulang maklum kapado kayo.

PARNO  ADAT SIRIH  TIGO BUKU

Rangkang Susun Silang Bapatut

1. Adopun usul dengan asal, pangkan kato idak kito ninggan, terbit getah dari batang terbit ayie dari ulu terbit angin dari pohon, terbit kato dari mulo nyoh.
2. Mano menjadi mulo katonyoh, cerpah nan bakutak-kutak, sakutak parapit tudung. Sembahku ini mulai bajejak dari pangkan teruh ka ujung.
3. Tebin balingkek dingan undang, tapian bapagar baso lebuh bapagar dengan laheng jalan basapu dengan adat, laman basapu dengan pakai bendun balukis balembago. Atap bajahit dengan kato, umah batiang bataganai.
4. Rakru minal asani, kajambak kajamburuh. Ditasdidkan dalam hati diikrarkan dengan lidah, sahidaran perkataan ku ini mintak disampaikan oleh Allah Subhanahuwata’ala.
5. Azulul minallah, azalul binarrasul. Asal turun dari pado Allah, usul datang dari pado rasul. Tak kalo nabi kito menerimo agamo Islam, didalam Masjidil Haram, diNagari Mekkah Mukarramah dekat Ka’bah dalam Baitullah.
6. Mako bershalawat nabi kito digua Hira diwaktu itu, turunlah Qur’an tigo puluh jus untuk diperbentang diperpanjang untuk pedoman kito dingan hidup. Jadi amal pulo bagi uhang dingan mati.
7. Diturunkan pulo kitab seratus empat buah kitab. Makonyo tentu pulo iman, islam, tauhid, ma’rifat. Disitu pulo terdapat sah dengan batal, halal dingan haram, harus dingan makruh, pardu dingan sunat, mako lahirlah Adat bersendi sara’, sara’ bersendi kitabullah. Serak yang mengato, adat yang memakai, serak kembang kamuko, adat kembang kebelakang.
8. Mano dikatokan serak kembang kamuko, adat kembang kebelakang. Serak kembang kamuko mempedomani Qur’an dingan hadits nabi kito Muhammad Rasulullah SAW, adat kembang kebelakang mengambil contoh yang telah sudah mengambil tuah yang telah menang, mengambil tauladan yang baik sebagaimano pulo kito meneladani nabi Muhammad SAW.
9. Jadi nampaknyoh lah bertemu pulo pesat dengan lukah, patut disirit daun jalo, bertemu adat dingan kitabullah. Patut pulo kito bilang hajat uhang sipungko.
10. Mano pulo hajat uhang sipungko, kalu nak tau pado ujung kembali kito pado pangken, nak tau pado pangken, kembali pulo kito pado asal.
11. Jadi nampaknyoh adopun uhang umah ini lah barunding barinok, pipihlah dapat dilayang, bulek lah dapat digiling. Lah bajalan pulo sirih selai pinang sibuah, menuju umah ninek mamak pati panghulu, anak jantan taganai umah.

Ado dih malayu ngato :

1. Uhang batauh di ujung tanjung, malanca diayie mulih, nampak nan dari ateh kuto. Dingan jauh dipanggin untung, dingan dekat dipanggin sirih, dingan parak dipanggin kato.
2. Manolah kayo depati panghulu, ninek mamak serto anak jantan taganai umah. Ini nampaknyoh  jambanlah tau pado licin, bung lah tau menyeng, manusio lah tau pulo pado salah nyoh.
3. Lah mengampaikan sayap, menungkatkan paruh, terhadap pado kayo Sko ngan tigo takah. Ini pumen takah pertamo berisi breh sapinggan ayam saiku, sarato berisi pulo dingan manek sebah dingan siawan, sarato pulo dengan meh sepetai limo bleh bentuk cincin. Terhadap kayo anak jantan teganai umah, kayo mengetahui uhang masuk uhang kalua, kayo manunggu parit dingan tarampa, Hulubalang tabin nagari.
4. Ini pulo takah kaduo, berisi breh duo puluh kambek siku, kambek lpeh ditengah padengnyoh, breh tinggan dalam sarbunyoh, sarato pulo berisi dingan gelang dingan sebuah serto pulo meh sakundi duo puluh bentuk cincin menghadap pado kayo ninek mamak. Kayo mengetahui anak buah anak panakan, ngan nepeh ka pagi nguhung ka petang, mengetahui jengkun dengan paku, silang dingan salisih, mengetahui uhang masuk uhang kalua, uhang datang uhang tibo, uhang datang nampak muko, uhang lahi nampak punggung.
5. Ini takah yang katigo, berisi pulo breh saratuh kerbau saiku. Kerbau agi lepeh dipadengnyoh, breh agi tinggan dalam sarbunyoh. Sarto berisi pulo dingan kris panjang dingan sabilah, kagenti bedil dingan balaheh. Sarto pulo dingan meh saameh empat puluh bentuk cincin. Menghadap pado kayo pati panghulu, kayo dingan basangkak tinggi basangkak rendah. Kayo ngan megang tarupong  yang amat truh, ngan megang cermin idak kabu, megang ka lantak idak guyih, megang ka kait idak skah, ngan megang ka pusat jalo parimpun ikan.
6. Manolah kayo depati penghulu ninek mamak serto ngan anak jantan teganai umah. Kalu ado salah satu kayo dingan tinggi bukit dalam luhah, idak nyado ngan kumah. Umah sanak batino kito ini,

Ado Dih Melayu Ngatokah

1. masaklah kau buah imbang, buahnyo ditepi ayie, kalu salah mbuhnyo bautang, kalu bautang mbuhnyo mayie. Kalu langkang mintak dipatut, silang mintak disusun, keruh mintak dijernih, bacelak mak tambik karat, mandi mak tambik laki.
2. Kini idak pulo kito bentang panjang lebar nyoh, lurus jalan kasulak panjang, jalan basimpang kasulak ketek, basimpang pulo jalan kagao. Kalu kito bentang mbuhnyo panjang, bulih sipanjang tali lang-lang,  kini kito puntan bae maknyo singkek, kito ambik bae ngan baguno.
3. Bunginyo ketik garugo bandung, bunyinyo tri garugo hutan, nyo busik dalam rimbo. Aginyo titik agi ditampung,  aginyo mirih agi dilikam, kini kimalah dikayo.
4. Iyolah gunung kurinci kamaro imat, singgah berenti dusun semurup, kakjalan simpang kagao. Kaji pumennyo lah temat, kitab lah titungkut, kini pulang maklum pado kayo.

PARNO ADAT UNTUK :

NABAH GELAR UHANG MAKAI SKO

DIRUMAH GEDANG

1. Bismilah mulai munyalo, munyalo diiku lubuk, dapatlah ikan duo tigo,. Bismillah mulai bakato maaflah kayo sado dingan duduk, kami ini kno ucap kno sarayo.
2. Julung-julung manggali lembah, takik sariwah angin barapalu. Julung-julung sayo manarehkan sembah, sesat sepatah ambun baribu kali ampun.
3. Pisang sasikek duo sikek, taletak diateh paro, dahulu iyo sigalo lapek, kini toh iyo sigalo lupo.
4. Anak saruwang anak saruwi, anak saruwang kno pukat. Kalu tabilang tuang jangan nak muji, idak tara bilang tuan jangan nak ngupat.
5. Mangkuklah pecah cembunglah pecah, pecah mano diletakkan. Datuklah pangululah, sembah tu mano nak ditibokan.
6. Nak ilie ka indogiri, singgah berenti dusun palembang, jalan teruh ka sungai ipuh. Sayo ni tegak baradiri kak tiang panjang dengan sebatang. Sanak batino duduk batarlun batarimpuh.
7. Menghadap kepado kayo, bungkan dingan empat, tigo lurah isi Nagari. Diateh payung kembang sekaki, dibawah lapik buntak paradokan mas. Tuan duduk barasilo karang satio nak diparasumpahkan.
8. Kecik tu nak diberi gela, gedang tuh nak diberi namo. Namonyo : ............................... kecik tu sudah diberi gela. Gedang tuh sudah diberi namo. Menuhut sipanjang adat icuk-ico pegang pakai, lukis dingan banding, gantang idak kupak, cupak idak sumbing, sko gedang dilpeh. Gla gedang disanjung, di panaik di patuhun, depati di penaik, bereh seratuh kerbau saiku, nenek mamak di penaik, breh duo puluh kambing saiku. Menuhut sepanjang adat, megang ka cupak dingan gantang, megang ka adat dingan lembago, megang undang dingan taliti.
9. Megang ka anak buah anak kemenakan, ngan nepeh ka pagi nguhung ka petang. Ngan tau jengkun dingan paku, silang dingan salisi. Mengetahui uhang masuk uhang kalua, uhang datang uhang tibo, uhang datang nampak muko, uhang lahi nampak punggung.
10. Mengetahui uhang yuk uhang timpang, uhang ibuk balih rupo. Ngan tahu di hadits nabi dalil qur’an.
11. Diseru cepat tibo, diimbau cepat datang, diserayo cepat pgi. Jangan pulo bak kato uhang kini, pisau paraut ulunyo lentik, au cino belah dibelah, kalu paltut tuan jangan kno cdik, buat anak butino pecah belah.
12. Lurus-lurus tuan kayo memakai, beruk dirimbo keno susu, anak dipangku kno buang. Kalu iyo kato ka iyo, kalu idak kato ka idak. Jangan pulo sko mlah manyan, sebelah ditating sebelah dipijak, gung gedang duo sigayo, titin gali dalam Nagari.
13. Kalu menimbang tuan mak samo berat, kalu mengukum mak samo adil. Jangan pulo snggam kiri snggam kanan. Kalu manimbag tuan idak samo berat, kalu mangukum idak samo adil.

14. Batu hampa diateh kapalo

Pedang tajam ditapak kaki

Kalateh idak bapucuk

Kabawah idak baurat

Ditengah digirik kumbang

Kalu kadarat idak dapat makan

Kalu karayie idak dapat minum

Kunyit ditanam putih isi

Padi ditanam lalang ngan tumbuh

Dimakan sumpah karang satio dingan simangkuk

1. Pdang lah patah, baliung lah sumbing, taletak ditengah laman, lah disumpah lah dibimbing, karang satio diansak jangan.

Kalu diansak karang satio, lah rebah sikandang pampeh, lah tirampa sikandang bangun, mencit masuk makahung masuk, lah hilang luko bapampeh, lah hilang mati babangun, bah tiang panjang yang sebatang, kecut payung ungkeh mahkuto, blang kurik terendam belang.

Burung pikau terbang kelangit, tibo dilangit bacarito. Ilang pisau timbul penyahit, padam tuah cilako tibo.

Kecik umbak gedang umbank, kapa lalu kamaro sakai, adat idak agamo idak, mano mbuh anak batino selesai.

1. Urang kerinci mengirang padi, bardik putampi lumat, burayak munampi ampo. Padi tajemo nak manumbuk, lah lamo sayo tegak berdiri, kaki rasolah penat, suaro lah pahau pulo, mintaklah izin sayo nak duduk.

JAWABAN PARNO ADAT

UHANG TUMBUK KATO

1. Sarapat kito saisi rumah ini,  idak di tap idak dibilang, kecik idak  disebut namo, gedang tuh idak disebut gela.
2. Sado dilingkut bendun dengan empat, sado ditanai lantai dengan berpak, sado disungkut atap dingan basanggit.
3. Sungguh banyak ikan dilubuk, siku jugo ngan keno jalo, sungguh banyak kito  ngan duduk, diateh tika kembang berinai, iyo kami sini panumbuk kato.

Ado pulo dih malayu ngato :

1. Dalamlah lubuk uhang sungai landai, tempat uhang burulang nyalo, bukannyo pulo kito baduo nak ngacak cedik dengan pandai, menurut telatah telitih uhang tuo dulu.
2. Gedanglah ayie dari ulu, terendam pasa uhang Sungai Landai, bukan pulo kito nak nampung tekap panghulu,  idak pulo kito nak mecat batin dibalai.
3. Uhang buumo ditepi ayie, padi ngarembak sipadi payo, iyo timenung kanti bupikie, mikie nak munjawab sikato kayo.
4. Kepeng kayo kepeng timago, tintin sini timago pulo, kato kayo itu kato dawah kato pusako, kanti juwab dingan kato pako pulo.
5. Lah kayo bilang dari awal sampai ka akhir, jarang idak pulo patut disusun, kerap tu idak patut di tuheng, atehnyo gayung basambut, andai batingkah kato bujuwab.
6. Kalu idak kanti jawab kato kayo itu, pumennyo kami sini gdang mna babin manali, namun kanti jawab kato kayo itu, pumen kito cdik pandai salingkah kato.
7. Nampaknyo kato-kato kayo itu, sado diitung sado genab, sado dibilang sado cukut, sado di bincang iyo galo.
8. Kato-kato kayo lah kami denga, lah kami aning pulo basamo-samo, sado ngan tabentang menjadi baris, sado takilok menjadi uki. Kilok kalateh sampai karembun padu, kilok kabawah sampai kersik mudo, kalu kamudik lah tahulu, basuo ngan ayie titik gantung, tadenga pulo ngan samang baralun suhak serto ungko barambuk tangih, nangih ka untung hari paneh, hari paneh kamarau panjang, paut ka jung same anyut, kalu ka ilie lah tamaro basubok pulo ngan ikan beranak mensu.
9. Nampaknyo adat lata pakai salepeh, makai ka itu ado balain-lain. Jadi apo hajat uhang sipungko?

(Nikah-Kawin, Turun Mandi, dll)

1. Panjang jambak uhang sulak mukai, jalan teruh karenah sako, panceng iyo lah sampai, lah kami juwab pulo sipatah duo, tentang maco do’a samo-samo kito kima alur makan patut layak makan judu, uhang ngan sipatun dingan Allah, uhang kapaha dingan nabi.
2. Nak mudik ka koto rendah, singgah burenti tebing tinggi, pancengnyo iyo lah sudah, tentang maco do’a kito serah ka bae kak tuo ini/ atau tuo Ji.

PARNO ADAT

UNTUK NGTAK TANDO/BUTUNANG

1. Adopun usul dengan asal, pangkan kato idak kito ninggan, terbit getah dari batang terbit ayie dari ulu terbit angin dari pohon, terbit kato dari mulo nyoh.
2. Mano menjadi mulo katonyoh, cerpah nan bakutak-kutak, sakutak pararit tudung. Sembahku ini mulaibajejak dari pangkan teruh ka ujung.
3. Nampaknyo kami ini pgi balepeh balik batantik. Dilepeh ninek mamak depati panghulu, Sarato dengan anak batino kito.
4. Disuhuh nuhut unut dingan terentang, Nuhut jejak dengan tatukik, nalak katutu tigo gayo, balam paridi rentak kalo. Putuh unut, ilang jejak, padam suaro. Nampaknyo disini kayo ado manyimpan dawat hitam, Kartih putih, intan nin makuto sakti

Ado dih malayu ngato :

1. Nak mudik kasulak kecik,Singgah berenti ka batu jung, Pikie nian lah dalam hati kecik, Taho lun badan kayo tilangsung.
2. Kami ini ado mao getah dingan salidi, Mao jerat dengan semato, Getah cimedak nangko puri, Jerat unuh kalapo bisu,Tah ka kno ntah idak.
3. Inilah sirih datang mangunju,Pinang datang malintang, Sirih mangunju datang batuik, Pinang Malintang datang batanyo.
4. Kalunyo lun dilimbai kami ditunang kawan, Kami nak ngetak kacihi dingan lamat, Meh batunang tando jadi.

Ado pulo dih malayu ngatokah, Katutu balago empat, Balago dalam jerami, Kalu katuju tariklah cepat, Kalu idak sirai katepi.

1. Nak mudik kusulak panjang, jalan basimpang kusiulak ketek, basimpang pulo jalan kagao. Kalu kito bentang mbuhnyan nyo panjang, sipanjang tali lang-lang, minin kito puntan bae maknyo singkek, kito ambik bae sado ngan baguno.

10. Gunung kerinci kamaro imat, Singgah burenti dusun simuhut, Kak jalan simpang kagao. Kaji pumennyo lah temat, Kitablah titungkut, Pulang maklum pada kayo.

PARNO ADAT

UNTUK MULANG PANYANDA

1. Adopun usul dengan asal, pangkan kato idak kito ninggan, terbit getah dari batang terbit ayie dari ulu terbit angin dari pohon, terbit kato dari mulo nyoh.

Mano menjadi mulo katonyoh, cerpah nan bakutak-kutak, sakutak pararit tudung. Sembahku ini mulai bajejak dari pangkan teruh ka ujung.

1. Nampaknyo idak bariak untung kadatang, idak babaun cilako tibo, malang idak dapat ditulak, muju idak dapat diraih. Nampaknyo malang jugo ngan katibo, jatuhlah sakit gaek maso itu.
2. Kami selaku anak idak pulo kami kaileng lam dingan jampi, idu dingan tawa. Lah kami lalak pulo dukun ngan pandai tawa, mentri pandai ngubat. Nampaknyoh ado dih malayu ngato :
3. Apo sarat uhang mangubat, ado breh dingan sigantang, bukan pulo panyakit nyondak diubat, nampaknyo ajal tunian nganlah datang.
4. Iyolah Pa’alul limajurid, tuhan berkehendak sekehendak ati, iyolah ilang gaek maso itu, bukan pulo diyau ilang dibukit dingan tinggi, dilurah dingan dalam kapadang dingan ujo.
5. Diyau ilang dipangku anak buah kepunakan, iyo mati paman bagaaleng dingan panakan. Mati punakan bagaleng dingan mamak. Idak pulo bagaleng cinok kayu, bagaleng dingan adat pasko nyo.
6. Mano pulo adat paskonyo, masuk dingan kain pamakai petang, kalua pulo dingan panyanda.
7. Ado dih malayu ngato : bunginyo ketik garugo bandung, bunginyo tri  garugo hutan. Nyo burusik kadalam rimbo, agi titik agi ditampung, agi mirih agi dilikam, kimalah dikayo.

MULANG KEJO

UHANG NIKAH

1. Bismillah mulai munyalo, munyalo di iku lubuk, dapatlah ikan duo tigo, bismillah mulai bakato, maaflah  kayo sado ngan duduk, kami ini kno ucap kno sarayo.
2. Sarapat kito saisi rumah ini,  idak di tap idak dibilang, kecik idak  dipanggin gela, gedang tuh idak disebut namo. Sado dilingkung bendun dengan empat, sado ditanai lantai dengan berpak, sado disungkut atap dingan basanggit.
3. Sungguh banyak ikan dilubuk, siku jugo ngan keno jalo, sungguh banyak kito  ngan duduk, diateh tika kembang berinai, iyo kayo situ pumennyo tempat numbuk kato nyoh.

Ado pulo dih melayu ngatokah :

1. Dalamlah lubuk uhang sungai landai, tempat uhang burulang nyalo, bukannyo pulo kito baduo nak ngacak cedik dengan pandai, kito manyambung kato uhang sipungko.
2. Gedanglah ayie dari ulu, terendam pasa uhang Sungai Landai, bukan pulo kito nak nampau tekap panghulu,  idak pulo kito nak mecat batin dibalai.
3. Terentang pulo jalan kabangko, meniti jambak basumai, tegak dilua jadi sipungko, duduk dalam rumah jadi taganai.
4. Belumnyo lntik cinok taji, idaknyo landai cinok dulang, belum pulonyo cerdik cinok kami, idak pulonyo pandai cinok kawan.
5. Makonyo kayo situh tempat numbuk ka katonyoh,  lah badik lah batampi, lah ba ayak, lah ba indang, pumennyo kayo situ ngan megang pusat jalo parimpun ikan.
6. Kayo situ  pumennyo dingan tinggi dari jauh, dengan gedang pemenuh alam, tempat cupak gantang bateduh, ibarat ayam putih terebang siang, hinggap dikayu idak badaun, basuluh ngan mato ahi, basalai dingan bulan bintang, bagalanggang  mato uhang banyak.
7. Kayo situ dingan terendam salapuk tali, dingan tahan baka sipadam maro, dingan biaso bapasih ilie bapandang mudik, dingan tau dihadis nabi dalil qur’an.
8. Habis gayung pedang taletak, habis kaji suhat dilingkut. Kini kito kilok pulo ujung tali, tali untuk pungarang bungo. Kito kilok pulo sikali ini, kito tinjau pulo sejarah uhang tuo-tuo.
9. Mano pulo sejarah uhang tuo-tuo. 

Sahidaran gunung merapi singkaran batang marueh sahinggok sapisau, pisau hanyut. Salegok taletak ayie hitam, sahinggok sagileng ayie bangih, sahinggok durian ditakuk rajo sampai ka tiku pariaman.

1. Ka Gubah babandung dua, katempat puti siandam dewi, kalateh karembun padu, kabawah kersik mudo, kalu kamudik lah tahulu Basuo ngan ayie titi gantung. Ilielah tamaro basubok pilo dingan ikan baranak Mensu.
2. Nampaknyo adat lata pakai salepeh, makai ka itu ado balain-lain.
3. Atap bajahit dingan kato, bubung bakupung dingan serak, batiang batang  pasko. Badindin balantak adat, baansuk lembago undang, diateh jariau karang bajilin, diateh lantai kembang berpak, diateh tika kembang basuci, diateh lampit kembang barinai. Dinai adat dinai pasko, adat lansim pasko kawi suluh bindang dalam nagari.
4. Adat rumah basendi batu, bersendi bahaluan. Rumah batiang bataganai. Parit babinteng dengan pasko. Lebuh bapaga  dengan laheng.  Jalan panjang bakandang serak, sumo tagenang bapaga malu, pulau iluk tempat ibadat.
5. Lah batemu pulo pukat dingan lukah, patut disirat daun jalo. Lah batemu adat dingan kitabullah, patut pulo dibilang hajat uhang sipungko.
6. Jangan pulo idak dibilang usul dingan asal. Apo sebab dengan karano nyoh, jangan cinok makan bulih balin, cinok tebu di punggung musang, cinok ayie dalam sayak  idak bamaro idak bahulu. Jangen-jangen pulo cinok buluh hanyut tengah duo uweh, timbul-timbul tenggelam. Idak tentu ujung dingan pangken, idak adat pakai kito tentang itu.
7. Mano dingan adat pakai dikito, terbit getah dari batang, terbit ayie dari hulu, terbit angin dari puhun, terbit kato dari pado mulo.
8. 20.   Mano menjadi mulo katonyo : adat rumah bersendi batu, bersendi bahaluan, rumah batiang bataganai. Sado kito ngan duduk dirumah ini iyolah memenuhi sirih anak batino.
9. 21.   Yang mano anak uhang umah ini sudah menikah secaro adat, dan lah syah menurut agamo. Dimano kewajiban uhang tuo sipanjang adat yang dipakai uhang tuo-tuo ado limo parakaro, yang pertamo mao turun mandi kesungai, kaduo akiqah, katigo sunat rasul, kaempat melepeh nuntut ilmu, dan yang kalimo melepeh nikah kawin.
10. 22.   Jadi anak batino kito pado malam ini manggin kayo depati ninik mamak, anak jantan teganai rumah, iyolah untuk magih tau dan mulang kejo yaitu nak ngadokan lek dan munoh kaki empat, urang rumah ini nak melepeh raso syukur kehadirat Allah SWT, yaitu beliau melepeh kewajiban terhadap anak beliau yang terakhir, yaitu melepeh nikah kawin.
11. 23.   Yang mano kito ngan berhadir pado malam ini, mintak ditampung do’a berkat do’a, salamat mudah-mudahan anak baduo ini ngan bahu melangsungkan ijab kabul, mintak menjadi keluarga yang sakinah mawaddah warahmah hendaknyo.
12. Tampaknyo, luruh jalan kusulak panjang, jalan basimpang kusulak ketek, basimpang pulo jalan kagao, kalu kito bentang mbuhnyo panjang bulih sipanjang tali la-lang, minin kito puntan bae maknyo singkek, kito ambik sado ngan baguno.

Gunung kurinci kamaro imat, singgah burenti dusun simuhut, kak jalan simpang kagao, kaji pumennyo lah temat, kitab lah tatungkut, kami pulang maklum pado kayo.