Lalampahan ka Gurun Sahara. Bagean ka 1

Lalampahan ka Gurun Sahara. (Bagean ka 1.)

Dimana ayana ari Gurun Sahara? Gurun Sahara teh ayana di Benua Afrika. Dalapan belas jam ngapung ti Jakarta dina kapal udara kakara nepi ka tungtung kalerna Gurun Sahara anu paeunteung-enteung jeung Benua Europa nyaeta di basisir laut Mediterranean. Aya welasan Nagara anu asup kana wilayah gurun Sahara, saperti Mesir, Libya, Maroko, Nigeria, Tunisia, Algeria, Chad jeung nu sejena. Legana Gurun Sahara meh sarua jeung Amerika Serikat atawa China, nyaeta meh sapertilu tina legana Benua Afrika.

Kulantaran dongengna panjang, urang bagi kana sabaraha bagean

Gurun Sahara oge kawentar ku rally Paris-Dakar. Mimitina ti Paris Perancis, terus ngaliwatan Spanyol saencana asup ka wilayah Sahara di basisir kulon, ngaliwatan Selat Giblartar, terus ka Maroko, Sahara Kulon, Mauritania, nepi ka tungtungna di Dakar, nu aya di nagara Sinegal. Rally anu pinuh ku tantangan sarta bahaya, perlu kondisi kandaraan jeung jalmana anu prima. Kiwari rally Paris - Dakar teh diteruskeun nepi ka Jazirah Arab.

Lalampahan di gurun loba pisan bahayana, ku ayana badai gurun, angin anu muter anu bisa mindahkeun sagara keusik jadi gunung keusik “sand dune” anu bisa ngubur mobil atawa jalma. Lobana gawir gawir keusik anu teu katingali anu bisa nyababkeun mobil tibalik, atawa nanceb dina gundukan keusik atawa dina dasar lebak keusik. Kulantaran kitu pikeun lalampahan ka Gurun Sahara masing-masing Nagara ngabogaan aturan-aturan anu maneuh, anu tujuana pikeun ngajaga kasalametan jalma-jalma  anu daratang ka dinya, boh keur piknik wae atawa kaperluan anu aya patula patalina jeung pagawean.

Kuring kulantaran inditna ka Gurun teh asupna ti Libya, nya kudu milu aturan Nagara eta. Satiap jalma anu rek asup ka wilayah gurun kudu ngabogaan ijin, anu disebut “Desert Travelling Permit”. Saurang samobil pick up--”four-wheel-drive”-- anu disupiran ku nu boga SIM gurun, unggal mobil kudu mawa, 40 liter cai, 20 liter solar, “sleeping bag” jeung masing-masing mawa 2 ban serep. dahareun jeung inumeun sapuratina, ubar ubaran jeung peralatan P3K, telepon satelit, GPS jeung sajabana. Harita mah can aya BTS, jadi hp teu bisa dipake, duka ayeuna mah. Indit  duaan jeung babaturan anu sarua ti Jakarta, atuh perlu dua mobil sewang sewangan.

Jam 02:00 peuting geus siap indit, mawa bekel dahareun ti Hotel, ki Philippino, anu jadi Kepala Koki di Hotel rada horeameun dipentaan kudu nyadiakeun bekel jam sakitu teh, biasana cenah manehna kakara hudang. Tapi berkahna ku jampe “Kamustaka Kabayan”; manehna eleh deet nyanggupan sarta jam 02:00 peuting dahareun geus nyampak. Kuring meunang jampe “Kamustaka Kabayan” ti babaturan urang Filipina anu pamajikanana jadi pejabat Atase Kebudayaan di Kadutaan Filipina. 

Bismillah, indit we dua mobil; iring iringan, kuring kapeto jadi “Leader” da nyekel GPS, babaturan anu nyekel sarana komunikasi, nyaeta telepon satelit tea. Memeh indit ngontak heula ka kantor mastikeun anu tugas jadi “Journey Manager”, ki Bule urang Calgary, Canada geus siap. Tugas  Journey Manager nyaeta monitor perjalanan sarta nyatet sagala rupa kajadian anu kaalaman salila lalampahan, unggal 2 jam sakali, manehna kudu standby di kantor salila anu lalampahan can mulang. 

Mimiti nyorang jalan anu rubak jeung mulus, mobil setir kenca da jalana dijalur katuhu siga di nagara Arab sejena. Dua jam ti harita geus nepi ka gerbang gurun anu ayana dina sela sela gunung batu jeung cadas, pamandangan didominasi warna abu abu jeung coklat semu hideung lain sarwa hejo siga diurang. Jalan mimiti pungkal pengkol jeung nanjak, nyorang Jabal Nafusah (“great jabal”). Jabal Nafusah, anu ngarupakeun galengan gede anu misahkeun kota Tripoli jeung gurun. 

Tidinya kaluar tina jalan aspal, terus asup ka jalan inspeksi pipah anu disebut “Right-of-way” atawa “ROW”, dina jero ROW dikubur sababaraha jalur pipa anu galede, 42” jeung 36” gurat tengahna, anu ngamalirkeun minyak ti tengah gurun ka basisir, anu jauhna 1500 kilometer, pikeun dikapalkeun keur kaperluan “export”. Jalanan batu jeung karikil anu racleng mun diliwatan ku mobil teh, matak ngabahayakeun kana ban. Teu kungsi lila gejejes ban mobil anu ditumpakan ku kuring kempes, pas ditingali geuning soek kana batu anu seukeut; Tah geuning geus karasa mangfaatna mawa ban serep dua teh.

Kulantaran di gurun mah teu aya hujan, jadi ROW ti mimiti dijieun, nepika kiwari teu aya parobihan kaayaana teh, mun di urang pasti geus ngajejembrung jukutna, urugan pipahna pasti geus ngadedet kahandap kadedetkeun ku cileuncang, “settlement” tea cenah; atawa aya sabaraha tempat anu urug ilaharna lamun taneuh kasiram ku cai hujan. 

Tempat anu dituju ayana 500 Km kiduleun kota Tripoli; diditu bakal panggih jeung perwakilan Perusahaan “partner” anu lokasi ”Field” na jauhna 1000 Km ti Tripoli. Jadi bakal panggih ditengah tengah dimana aya “above ground facility”, fasilitas produksi migas anu bakal dipake babarengan. Ki Partner mah tidituna make kapal udara leutik, sarupaning kapal capung; da di gurun mah gampang nyieun landasan kapal terbang teh da taneuhna batu jeung keusik, kitu oge nyieun jalan, tinggal ngaspal wae dina batu jeung keusik anu geus dibebenah. 

Ma’lum ditempat asing nya, sok aya aya wae kajadian anu teu disangka-sangka, ki Babaturan katarajang nyeri beuteung. Di tempat anu hara haraeun teu aya “Rest Area” atawa Toilet Umum; nu aya ngan kudu nyalingker tukangeun batu, bari dipangjingnjingkeun cai sajeriken anu 20 liter ku ki supir Arab. Tah eta salah sahiji gunana mekel cai 40 liter teh.

Beres eta maju deui neruskeun lalampahan, geus waktuna ngontak ka Journey Manager, anu kudu aya komunikasi atawa laporan posisi unggal 2 jam. Ki babaturan kacida reuwaseuna mireungeuh radio euweuh dina tempatna, da tadi mah disakuan dina baju rompi, cenah. (Hanca). 

Urang cukupkeun sakieu heula bagean kahijina nya.

Cinunuk, Wanci Dhuhur, 4 Juni 2024

Rachmat Sudjana